Скрынсэйвер (ад англ. screen – экран і save – захоўваць) – як функцыя ці асобная праграма гашэння экрана – першапачаткова выкарыстоўваўся для зніжэння энергаспажывання і зносу лямпавых манітораў падчас спячага рэжыму камп’ютара. Сёння скрынсэйверы бессэнсоўныя з пункту гледжання іх функцыянальнасці, але яны працягваюць выкарыстоўвацца ў якасці дэкаратыўнай застаўкі падчас неактыўнага рэжыму. Эстэтыка скрынсэйвераў, як частка эстэтыкі Windows95 і першых масавых камп'ютарных тэхналогій, атрымала другое нараджэнне дзякуючы жанру vaporwave, які, выкарыстоўваючы занадта хутка састарэлыя або незапатрабаваныя візуальныя прадукты, што сталі інтэрнэт-смеццем, крытыкаваў і праблематызаваў капіталістычны аптымізм канца дваццатага стагоддзя. Абапіраючыся на эстэтыку і стылістычныя прыёмы папулярных скрынсэйвераў канца 90-х, праца ўяўляе з сябе серыю відэазаставак, прысвечаных беларускім рэаліям у сферах эканомікі, культуры, права на горад і палітычнага пратэсту. Тэмы, выклікі і наратывы, абраныя мастаком, – жывыя і ў бесперапынным руху, але ў той жа час яны паўтараюцца і не вырашаюцца, яны замарозіліся і супыніліся –- як і медыум скрынсэйвера.