Установа культуры "Мастацка-этнаграфічны музей імя Язэпа Нарцызавіча Драздовіча" размешчаны ў былой сядзібе Шырынаў. Палац быў пабудаваны ў перыяд з 1782 - 1828 гг.

Комплекс былой сядзібы Шырынаў унесены ў спіс гісторыка-культурных каштоўнасцей Рэспублікі Беларусь. З паўночнай часткі часткова захаваўся парк, закладзены ў XVIII стагоддзі.

Музей быў заснаваны ў 1991 годзе і займаў трэцюю частку будынка, у астатніх памяшканнях размяшчаўся дзіцячы садок.

У музеі знаходзяцца 4 экспазіцыйныя залы. У дзвюх залах першага паверха размешчана этнаграфія, дзве залы другога паверха прысвечаны жыццю і дзейнасці вядомага беларускага мастака, скульптара, археолага, астранома, пісьменніка Язэпа Драздовіча. У музеі экспануецца 14 арыгінальных работ мастака, 24 захоўваюцца ў запасніках.

Асноўны фонд музея складае 6815 музейных прадметаў. Музей актыўна працуе для павышэння турыстычнай прывабнасці рэгіёна і папулярызацыі гісторыка-культурнай спадчыны. Штогод установа культуры прымае ўдзел у міжнароднай акцыі "Ноч музеяў". Традыцыйна праводзіць "Бульбяны фэст", сустрэчы з пісьменнікамі, дзеячамі мастацтва і краязнаўцамі. Вялікая ўвага надаецца мерапрыемствам патрыятычнай накіраванасці ў рамках праекта "Малой радзімай аб'яднаныя, з ёю лёсам знітаваныя адным". Мэта праекта - стварэнне аптымальных умоў для знаёмства школьнікаў з гісторыяй роднага краю.

Супрацоўнікі музея выкарыстоўваюць разнастайныя формы работы: тэатралізаваныя, віртуальныя экскурсіі, краязнаўчыя падарожжы-экспедыцыі, музейныя інтэрактыўныя заняткі, квэст-гульні, экалагічныя і патрыятычныя акцыі, ствараюць відэазамалёўкі.