Гісторыя семінара пачалася каля года таму, калі група беларускіх мастакоў брала ўдзел у сустрэчы Minsk Сonnection у Стакгольме. Абмен творчым вопытам аказаўся плённым для планавання сумесных праектаў, адным з якіх стане прыезд шведскіх медыя-мастакоў у Мінск з прэзентацыямі творчых работ, лекцыямі і майстар-класамі.

NAMM - гэта ініцыятыва па развіццю мастацкага асяроддзя ў інтэрнэт-культуры Беларусі. Мэта семінара - прадстаўленне тэндэнцый і форм мастацтва, звязаных з інтэрнетам, ініцыяванне мастацкіх сеткавых праектаў, заснаваных на камунікацыйных сродках і лічбавых тэхналогіях, развіццё інфармацыйнага асяроддзя сучаснай мастацкай культуры. А галоўная задача - развіццё творчага супрацоўніцтва паміж беларускімі і замежнымі медыя-мастакамі. Акрамя таго, семінар і творчыя сустрэчы дазволяць зрабіць агляд беларускай культурнай сітуацыі ў інтэрнэце.

Тэма сеткавага мастацтва для такой сустрэчы была абрана дзякуючы дынамічнаму развіццю гэтага мастацкага віду дзейнасці і з-за яе адноснай навізны для беларускай мастацкай сцэны.

Сеткавае мастацтва - з'ява разнапланавая. Гэтае поле сінтэзу розных відаў мастацкіх практык і тэорый, тэхнічных і тэхналагічных рашэнняў, сацыяльнага ўзаемадзеяння і мадэлявання. Развіццё і з'яўленне новых відаў і форм мастацтва зараз часта абумоўлена з'яўленнем новых (напрыклад, тэхнічных) сродкаў і магчымасцяў. Тут складана ўказаць на агульныя прыярытэты і прынятыя мастацкія стратэгіі, таму пытанне дакладнага вызначэння Net-art знаходзіцца на стадыі абмеркавання. Існуюць шматлікія разыходжанні: сеткавае мастацтва, Web-art, мастацтва для Сеткі, мастацтва ў Сеткі - і далей па розных кірунках.

У ходзе семінара праходзілі:

• - Прэзентацыі творчых праектаў удзельнікаў.

• - Тэарэтычныя выступленні (круглы стол) па наступных пытаннях: аспекты сеткавага мастацтва і мастацтва ў Сеткі; патэнцыял, магчымыя шляхі і стратэгіі развіцця сеткавага мастацтва ў Беларусі, сістэматызацыі мастацкіх сеткавых рэсурсаў.

• - Творчыя майстэрні замежных удзельнікаў.

• - Стварэнне і планаванне сумесных мастацкіх праектаў.

• Арганізатары і падтрымка:

  - Асацыяцыя Сучаснага Мастацтва;

  - Ініцыятыўная група навукова-практычнага семінара "Internet-тэхналогіі, Web-дызайн і камп'ютарная графіка" пры Еўрапейскім гуманітарным універсітэце;

  - студыя Вока

  - Art 375

  - галерэя Nova

  - CRAC (Швецыя)

  - Шведскі Інстытут

  - Network Systems ISP