Мастацтвазнавец, мастак, прафесар Беларускай акадэміі мастацтваў, кандыдат мастацтвазнаўства, этнограф, этнолаг, выкладчык, загадчык кафедры гісторыі і тэорыі мастацтваў, найбуйнейшы даследчык матэрыяльнай культуры беларусаў XX стагоддзя.

Заснаваў часопіс "Мастацтва Беларусі" і стаў яго першым галоўным рэдактарам. Стварыў сцэнічныя строі для Дзяржаўнага народнага хору і Дзяржаўнага ансамбля танца Беларусі. За ўласныя грошы правёў дзясяткі этнаграфічных экспедыцый, пладамі якіх сталі больш за 130 рэканструкцый традыцыйных касцюмаў беларусаў. Архіў Міхаіла Раманюка налічвае больш за 100 тысяч адзінак унікальнага этнаграфічнага матэрыялу, сабранага яго ўласнымі рукамі; дарожныя дзённікі складаюць дзясяткі тамоў. Важная частка шматгадовай творчай працы Міхаіла Раманюка – артыкулы і ілюстрацыі ў энцыклапедыях: "Беларуская савецкая энцыклапедыя", "Энцыклапедыя Літаратуры і Мастацтва Беларусі", "Этнаграфія Беларусі".

Як спецыяліст па касцюмах ствараў сцэнічныя касцюмы для Нацыянальнага акадэмічнага народнага хору Рэспублікі Беларусь імя Г. І. Цітовіча, Дзяржаўнага ансамбля танца Рэспублікі Беларусь і некаторых самастойных калектываў. Прадстаўляў на сцэне амаль дакладна аўтэнтычныя беларускія строі. Таксама выступаў кансультантам шматлікіх мастацкіх фільмаў кінастудыі "Беларусьфільм", дапамагаў у стварэнні экспазіцый Заслаўскага музея народных промыслаў і рамёстваў.

Жыў і працаваў у Менску.