"Алфавіт вайны" – міжнародны выставачны праект, які аб'ядноўвае аўтарскія выказванні мастакоў з Беларусі, Расіі і Украіны на тэму Другой сусветнай вайны. Фотаздымкі, архіўныя і змадэляваныя артэфакты, інсталяцыі, жывапіс і графічныя лісты складваюцца ў экспазіцыю і ствараюць кантэкст для даследавання і пошуку адказаў на пытанні: як мы сёння ўспрымаем і рэагуем на паведамленні Другой сусветнай / Вялікай Айчыннай вайны, як яны счытваюцца сучасным чалавекам і якія першапачаткова існуючыя сэнсы захоўваюцца ў гістарычнай памяці нашых сучаснікаў? Часцяком гісторыя для нас – гэта нейкі ўстойлівы наратыў, які будуецца на выбраных ключавых падзеях з абазначанымі героямі/антыгероямі. Дадзеная выстава – нагода ўбачыць і распавесці гісторыю па-іншаму. 9 аўтараў распрацоўваюць тэму вайны праз прызму прыватнай сямейнай міфалогіі, злучаючы "жывую памяць пра вайну" з "жорсткай суб'ектыўнасцю" фотасведчанняў і дакументаў, здзяйсняючы інтэрвенцыю гісторыі ў інтэрнэт-прастору, даследуючы "мову жэстаў" вайны, нанова абазначаючы ролю спадчыны ваеннага мінулага. Праект становіцца мастацкім дзеяннем па разметцы гістарычных архіваў на фоне сучаснасці. Сучаснае мастацтва ажыццяўляе такое дзеянне праз аб'екты-вобразы, якія працягваюць перадаваць інфармацыйныя сігналы рознай ступені сацыяльнай, гістарычнай і эмацыйнай інтэнсіўнасці. Гэтыя мэсэджы акумулююцца ў створанай сістэме, пазначанай як "Алфавіт вайны".