Мастак, фатограф, канцэптуаліст.

Фатаграфічную практыку Ігара Саўчанку разглядаюць у кантэксце феномена мінскай школы творчай фатаграфіі.

Творчасць Ігара Саўчанкі ўнікальная для Беларусі: з пачатку 1990-х да нашага часу мастак паслядоўна правяраў, разбураў і відазмяняў фатаграфію, адракаўся ад фатаграфавання і зноў да яго вяртаўся. Яго канцэптуальную серыю “Нябачнае” можна прадставіць як праграмную для мастака, дзе найбольш бескампрамісна адбілася адмова ад фотавыяўлення на карысць наратыўнага подпісу.

Творчы шлях мастака складана звязаць з адным жанрам ці напрамкам. Нягледзячы на тое, што яго з'яўленне ў фатаграфічным полі Беларусі адбывалася ў цеснай сувязі з дзейнасцю мінскай школы творчай фатаграфіі, яго прафесійная эвалюцыя разгортвалася хутчэй у асабістых каардынатах. З 1998 па 2005 год Ігар Саўчанка стварае шэраг праектаў з выкарыстаннем тэкстаў і змешанай тэхнікі, часта задзейнічае як тэксты, так відэа- і аўдыёматэрыялы. Мастак актыўна выкарыстоўвае знойдзеныя фатаграфіі і архівы, перапрацоўваючы, кадрыруючы і трансфармуючы іх. Увосень 2006 года, пасля амаль дзесяцігадовага перапынку, ён зноў вяртаецца да фатаграфічнай практыкі, кардынальна змяніўшы бачанне фатаграфіі як медыума фіксацыі рэальнасці.

Жыве і працуе ў Менску.

-

Персанальны сайт:

igor-savchenko.com