Антаніна Слабодчыкава і Міхаіл Гулін, творцы з актыўнай грамадзянскай пазіцыяй, з кастрычніка 2022 года працуюць у Японскім палацы ў якасці стыпендыятаў праграмы “Ініцыятыва Марціна Рота” (MRI). “Ініцыятыва Марціна Рота” была заснаваная ў 2018 годзе Інстытутам імя Гётэ і Інстытутам сувязей з замежнымі краінамі (ifa). У супрацоўніцтве з мастацкімі і культурнымі ўстановамі, гатовымі прымаць стыпендыятаў і стыпендыятак, праграма дае мастакам і мастачкам, якім на радзіме пагражае небяспека з палітычных і (ці) сацыяльных прычын, магчымасць атрымаць прытулак на перыяд ад дванаццаці месяцаў і адкрыць для сябе новыя кірункі.
“Кафэ Беларусь ІІ: Комплекс Касандры” уключае найноўшыя творы мастацкай групы 1+1=1. Яны апавядаюць пра рашучае адстойванне свабоды мастацтва, тым самым скіроўваючы ўвагу на грамадска-палітычную сітуацыю ў сённяшняй Беларусі. Яшчэ напярэдадні выбараў 2020 года Антаніна Слабодчыкава намалявала тую самую піктаграму, што зрабілася ўсюдыісным сімвалам тых, хто на прэзідэнцкіх выбарах кінуў выклік лукашэнкаўскай аўтакратыі: сэрца ў спалучэнні з кулаком і жэстам “вікторыя”.
Комплекс Касандры — псіхалагічны эфект ігнаравання або адмаўлення песімістычных прагнозаў — выступае для мастакоў на выставе ў Японскім палацы ключом да разумення палітычнай сітуацыі Беларусі ў яе геапалітычным асяроддзі і ўспрымання краіны на міжнародным узроўні.
Міхаіл Гулін: “З 1994 года мая краіна вядомая ў Еўропе як апошняя дыктатура, яна завязла ў часе: “ужо не савецкая”, але і “яшчэ не дэмакратычная еўрапейская”. Тысячы палітвязняў, выкраданне людзей, узмацненне ўплыву Расіі — а ЕС і суседнія краіны збольшага выказваюць “глыбокую заклапочанасць”, ды на тым і ўсё. 24 лютага 2022 года сітуацыя памянялася”.
Персанальная выстава Антаніны Слабодчыкавай і Міхаіла Гуліна ў Дрэздэне даследуе ўнутраныя механізмы ўзаемадачынення паміж міфам і палітыкай, вельмі важнага якраз для аўтарытарных і рэпрэсіўных сістэм. Якую ролю адыгрывае міфалогія і якім чынам так званыя знакі лёсу інтэрпрэтуюцца на карысць улад? А якое значэнне мае вера ў правадыра як прарока або героя, што несвядома перадаецца з пакалення ў пакаленне? Каго можна назваць сапраўдным героем ці гераіняй у такіх варунках?
У экспазіцыю ўвайшло каля 25 прац, сярод якіх відэа, перформансы, графіка і інсталяцыі, створаныя пасля 2020 года, а таксама новыя графічныя і мультымедыйныя творы, распрацаваныя адмыслова для выставы ў Японскім палацы.
Крыніца: www.skd.museum