Мастацкі музей - філіял Брэсцкага абласнога краязнаўчага музея, адкрыты 17 мая 2002 года ў будынку былой Паўднёвай казармы на тэрыторыі мемарыяльнага комплексу "Брэсцкая крэпасць - герой". У музеі, агульнай плошчай 1670 м², 12 залаў, дзве з якіх выставачныя. Асноўная экспазіцыя музея размясцілася ў дзесяці залах, якія ўтвараюць урачыстую анфіладу. У ёй прадстаўлена больш за 500 твораў жывапісу, графікі, скульптуры, дэкаратыўна – прыкладнога мастацтва і народных мастацкіх рамёстваў, якія расказваюць пра шляхі станаўлення і развіцця выяўленчага мастацтва і народнай творчасці Брэстчыны сярэдзіны ХХ – пачатку ХХI стагоддзя. Мастацкая калекцыя пачала фармавацца ў абласным краязнаўчым музеі ў 1950-я гады і сёння налічвае больш за 2000 твораў.